gossip lanka

ජනපති සිය වැටුප ගැන කිව්වේ බොරුලු - ඒකාබද්ධ විපක්ෂය කියයි

ජනාධිපතිවරයා සිය වැටුප සම්බන්ධයෙන් කළ ප‍්‍රකාශය සාවද්‍ය බව ඒකාබද්ධ විපක්ෂයේ පාර්ලිමේන්තු මන්ති‍්‍ර ප‍්‍රසන්න රණතුංග පවසනවා. ජනාධිපතිවරයා ඊයේ (04) පොළොන්නරුවේදී ප‍්‍රකාශ කළේ තමන්ට අනූ පන්දහසක වැටුපක් පමණක් හිමිවන බවයි.

මීට ප‍්‍රතිචාර දක්වමින් පාර්ලිමේන්තු මන්තී‍්‍ර ප‍්‍රසන්න රණතුංග කියා සිටියේ මෙම ප‍්‍රකාශයෙන් ජනාධිපතිවරයා ජනතාව නොමග යවා ඇති බවයි.

එහිදී "ජනාධිපතිතුමා එවැනි ප්‍රකාශයක් කරන්නේ..එතකොට එතුමට ලැබෙන අනූපන්දහසෙන්ද ඔය සංග්‍රහ වියදම් කරන්නේ.. දුරකතන බිල් ගෙවන්නේ...එහෙම කියනවා නම් මුළු රටම දන්නවා ඒක බොරුවක් කියලා. එතුමා ඔයිට වඩා වගකීමකින් ඔය වගේ ප්‍රකාශ සිද්ධ කරන්න ඕනේ. ඔය ප්‍රකාශය ජනතාව නොමග අරින්න කරපු එකක්. ඒ නිසා ජනතාවට ඇත්ත කිව්වා නම් හොඳයි." යනුවෙන් සඳහන් කළා.

පාර්ලිමේන්තුවේ විපක්ෂයේ මන්ති‍්‍රවරුන්ගේ වැටුප රුපියල් දෙලක්ෂ අසූදහසක් පමණ වන බවයි පාර්ලිමේන්තු මන්ති‍්‍ර ප‍්‍රසන්න රණතුංග පැවසුවේ. කෙසේවෙතත් ආණ්ඩුවේ ඇමතිකම් නොදරන මන්ත්‍රිවරුන්ට සංවර්ධන කමිටුවල සභාපතිවරු හැටියට රුපියල් ලක්ෂ 05කට වැඩි මුදලක් ලැබෙන බවද සඳහන් කළා.

පාර්ලිමේන්තු මන්ති‍්‍රවරුන්ට වඩා රාජ්‍ය ඇමතිවරුන්ගේ සහ නියෝජ්‍ය අමාත්‍යවරුන්ගේ වැටුප වැඩි බවයි ජනතා විමුක්ති පෙරමුණ පැවසුවේ. මන්ති‍්‍රවරුන්ගේ වැටුප් වැඩි කිරීමට ජනාධිපති ඉඩ ලබා නොදෙන බවට කළ ප‍්‍රකාශය ද මෙහිදී එම පෙරමුණේ පැසසුමට ලක්වුණා.