“විජේවීර ඝාතනය ඉවසා සිටි සමාජය රට විනාශ කිරීමට පාර කැපුවා” – බාහු

ජනතා විමුක්ති පෙරමුණේ ආරම්භක නායක රෝහණ විජේවීර තිස් අවුරුද්දකට ඉහතදී අත්අඩංගුවේ දී ඝාතනය කිරීම ශ්‍රී ලාංකික සමාජය නිහඬව ඉවසා සිටීම යුද්ධයේ සිදුවූ අපරාධ සහ ආරක්ෂක අංශ නිලධාරීන් කරන මානව හිමිකම් උල්ලංඝනය කිරීම යටපත් කර ගැනීමට මග පාදා ඇති බවට නව සමසමාජ පක්ෂයේ නායකයා ප්‍රකාශ කරයි.

“විජේවීරව අල්ල ගෙන මැරුව. ඔක්කොම ත්‍රස්තවාදිය මැරුව කියල
කිව්වා. අපි නැගිටල කිව්වා අල්ල ගත්ත නම් නඩුවක් ඇහුවේ කොහෙද කියලා. කවුරුවත් ඇහුවේ නැහැ කොහොමද අත්අඩංගුවට ගත්ත මිනිහෙක් මැරුවේ කියලා,” යැයි ආචාර්ය වික්‍රමබාහු කරුණාරත්න 1989 දී සිදුවූ දේ සිහිපත් කර දුන්නේය.

එම “විලම්බීතයට ඉඩ ඇරීමෙන්” රට විනාශකාරී මාවතකට යාමට ඉඩ සලසා ඇතැයි ආචාර්ය වික්‍රමබාහු කරුණාරත්න චෝදනා කළේය.

ඔහු බව කියා සිටියේ “යුක්ති සහගත මනුෂ්‍ය ඝාතන හා අතුරුදහන් කිරීම්” යනුවෙන් වූ සම්මන්ත්‍රණයක් අමතමිනි.

ත්‍රස්තවාදි ළමයි ද හමුදා ක්‍රියාකාරිත්වය ද?

කොළඹ සහ ඒ අවටින් 2008 - 2009 සමයේ 11 දෙනකු පැහැරගෙන ගොස් වධහිංසා කොට මරා දමන ලද බවට චෝදනා ලබන නාවික හමුදා නිලධාරීන්ට නීතියෙන් වසං වී සිටීමට ආධාර අනුබල දුන් ආරක්ෂක මාණ්ඩලික ප්‍රධානී රවීන්ද්‍ර විජේගුණරත්නට රහස් පොලිසියට කටඋත්තර නොදී මෙක්සිකෝව බලා යාමට ඉඩ සැලසීමද නව සම සමාජ පක්ෂ නායකයාගේ දැඩි දෝෂ දර්ශනයට ලක්විය.

පැහැරගන්නා ලද එම පිරිස ඇතුළු පුද්ගලයන් ත්‍රස්තවාදීන් ලෙස නම් කොට හමුදා අත්අඩංගුවේ දී ඝාතනය කිරීම රජය විසින් අනුගමනය කරන නීති විරෝධී කටයුත්තක් ලෙස ඔහු විසින් හෙලා දකිනු ලැබිනි.

“ත්‍රස්තවාදීන් ඒ ළමයි එකොළහද, ත්‍රස්තවාදය ඒ ළමයි එකොළහ අල්ලගත්ත හමුදා ක්‍රියාකාරිත්වයදැ,” යි ආචාර්ය වික්‍රමබාහු ප්‍රශ්න කර සිටියේය.

හමුදාවන්ට වාසිදායක වන ලෙස :

පුද්ගලයන් පැහැරගෙන ගොස්, වධහිංසා කිරීම හා ඝාතනය සම්බන්ධයෙන් චෝදනා ලබන හමුදා නිලධාරීන් ට එරෙහිව පරීක්ෂණ කරන නිලධාරීන් කැඳවා බැණ වැදී ඇති ජනාධිපති මෛත්‍රිපාල සිරිසේන මෑතදී කියා තිබුනේ මානව හිමිකම් රැකීම වෙනුවෙන් එක්සත් ජාතීන් සමග ඇති කරගත් එකඟතා රජයේ ආරක්ෂක අංශ වලට වාසිදායක ලෙසින් වෙනස් කරගන්නට පියවර ගන්නා බවයි.

ජනාධිපති නීතිඥ සාලිය පීරිස්ගේ නායකත්වයෙන් යුත් අතුරුදහන් පිළිබඳ කාර්යාලය සිය නිර්දේශ ඇතුලත් වාර්තාව බාර දීමත් සමගම ජනාධිපතිවරයා හමුදා නිලධාරීන් ගලවා ගැනීමේ අරමුණින් ගන්නට සුදානම් වන එම පියවර කිසිසේත් අනුමත කළ නොහැකි බව නව සමසමාජ පක්ෂයේ නායකයා ආචාර්ය වික්‍රමබාහු කරුණාරත්න මෙම සම්මන්ත්‍රණය අමතමින් වැඩි දුරටත් කියා සිටියේය.

(ceylonnews)