gossip lanka

SPMC නව ඖෂධ කර්මාන්ත ශාලාව විවෘත කිරීම ජනපති, සුව ඇමැති ප්‍රධානත්වයෙන්

රාජ්‍ය ඖෂධ නිෂ්පාදන නීතිගත සංස්ථාවේ ඖෂධ නිෂ්පාදන ධාරිතාවය වැඩි කිරීමේ අරමුණින් ඉදිකරන ලද නව ඖෂධ කර්මාන්ත ශාලාව ඔක්තෝම්බර් මස 12 (අද) දින පස්වරු 4.00 ට විවෘත කිරීමට කටයුතු යොදා තිබේ.

ජනාධිපති මෛත්‍රීපාල සිරිසේන මහතා සහ සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න යන මහත්වරුන්ගේ ප්‍රධානත්වයෙන් නව කර්මාන්ත ශාලාව විවෘත කිරීමට නියමිත අතර
රත්මලාන කදවලවත්ත ප්‍රදේශයේ එය ඉදි කර ඇත.

රජය පවසන පරිදි මෙම කර්මාන්ත ශාලාව ඉදිකිරිම සඳහා වැය කළ මුළු මුදල ජපන් යෙන් මිලියන 1240 කි.

ජපානයේ “ජයිකා” ව්‍යාපෘතිය යටතේ ලැබුණු ආධාර මත මෙම කර්මාන්ත ශාලාව ඉදිකර තිබේ.

රජයේ ප්‍රවෘත්ති දෙපාර්තමේන්තුව සදහන් කරන පරිදි මුළු මුදලින් යන්ත්‍රෝපකරණ සඳහා වැය කළ මුදල ජපන් යෙන් මිලියන 910 කි.

ජර්මනිය, ජපානය, දකුණු කොරියාව සහ චීනය යන රටවලින් යන්ත්‍ර සූත්‍ර ආනයනය කර ඇත.

රාජ්‍ය ඖෂධ නිෂ්පාදන නීතිගත සංස්ථාවේ දැනට පවතින නිෂ්පාදන ධාරිතාව වසරකට පෙති හෝ කරල් මිලියන 1922 කි.

මෙම ව්‍යාපෘතිය මගින් එය මිලියන 3337 ක් දක්වා වැඩි වන බව රාජ්‍ය ඖෂධ නිෂ්පාදන නීතිගත සංස්ථාව සදහන් කරයි.

එමගින් සෞඛ්‍ය අමාත්‍යාංශයේ වෛද්‍ය සැපයුම් අංශයේ ඖෂධ අවශ්‍යතාවයෙන් සියයට 70 ක් පමණ රාජ්‍ය ඖෂධ නිෂ්පාදන නීතිගත සංස්ථාව සපයනු ලබයි.

මහාචාර්ය සේනක බිබිලේ ඖෂධ ප්‍රතිපත්තියට අනුව ශ්‍රී ලංකාවට අවශ්‍ය ඖෂධ මෙරටදීම නිෂ්පාදනය කිරීමේ වැඩපිළිවෙල සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා ආරම්භ කර තිබේ.

ඒ අනුව මෙම නව කර්මාන්ත ශාලාව ඉදිකිරිමට අමතරව දේශීය හා විදේශීය ඖෂධ නිෂ්පාදන සමාගම් 46 ක් සමග නව කර්මාන්ත ශාලා ඉදිකිරිමට ගිවිසුම් අත්සන් කර ඇත.

එම ගිවිසුම්වලට අනුව දැනට නව කර්මාන්ත ශාලා 03 ක් හොරණ, මහනුවර සහ දිගන ප්‍රදේශවල ඉදිකර ඇති අතර, එහි නිෂ්පාදන වෛද්‍ය සැපයුම් අංශයට ලැබෙන බව රජය සදහන් කරයි.

තවත් ඖෂධ නිෂ්පාදන කර්මාන්ත ශාලා 03 ක් 2019 වසරේ මුල් භාගයේ දී විවෘත කිරීමට නියමිතය.

ශ්‍රී ලංකාවට අවශ්‍ය ඖෂධවලින් සියයට 90 ක් වසර 2020 වන විට මෙරටදීම නිෂ්පාදනය කිරීම තම අරමුණ බව සෞඛ්‍ය, අමාත්‍යවරයා ප්‍රකාශ කරයි.

මෙලෙස ඖෂධ නිෂ්පාදනය කිරීම තුලින් ශ්‍රී ලංකාවට අවශ්‍ය ඖෂධ ආනයනය කිරීම සඳහා වාර්ෂිකව වැය කරන රුපියල් බිලියන 40 කට අධික මුදල ඉතිරි කර ගැනීමට හැකි බව රජය පවසයි.

රාජ්‍ය ඖෂධ නිෂ්පාදන නීතිගත සංස්ථාවේ වත්මන් සභාපතිවරයා වන්නේ වෛද්‍ය සයුර සමරසුන්දර මහතායි.