අද සිකුරාදා : ජනපතිගේ තීරණාත්මක සාකච්ජාවක් රාත්‍රී 7ට !

ශ්‍රී ලංකාවේ වත්මන් දේශපාලන අර්බුදය සම්බන්ධයෙන් සාකච්ඡා කිරීම පිණිස සිකුරාදා (නොවැම්බර් 30) විපක්ෂනායකවරයා සහ එක්සත් ජාතික පෙරමුණේ නායකයන් මුණගැසෙන බව ජනාධිපති මෛත්‍රීපාල සිරිසේන මහතා කතානායක කරු ජයසූරිය මහතා වෙත දැනුම් දී තිබේ.

ජනාධිපතිවරයා ඒ බව පවසා තිබෙන්නේ ඊයේ (29) පාර්ලිමේන්තු
සැසිවාරයෙන් අනතුරුව ජනාධිපති ලේකම් කාර්යාලයේදී කතානායකවරයා සමග පැවති සාකච්ඡාව අවස්ථාවේදීය.

දෙදෙනා අතර ඉතා සුහද සාකච්ඡාවක් පැවති බවත්, එහිදී ජනාධිපතිවරයා දැක්වූ යහපත් ප්‍රතිචාරය පිළිබඳව කතානායකවරයා සුභවාදීව සහ බලාපොරොත්තු සහගතව සිටියි.

ජනාධිපති මෛත්‍රීපාල සිරිසේන මහතා, ඔක්තෝබර් 26 වෙනි දින අගමැති රනිල් වික්‍රමසිංහ මහතා පදවියෙන් පහකොට මහින්ද රාජපක්ෂ මහතා නව අගමැතිවරයා ලෙසින් පත් කිරීමත් සමග රටේ මතු වී තිබෙන "අවුල් සහගත දේශපාලන වාතාවරණය" සම්බන්ධයෙන් ජනාධිපතිවරයා සහ කතානායකවරයා සාකච්ඡා කොට කඩිනම් විසඳුමකට එළඹිය යුතු බව ඊයේ පාර්ලිමේන්තුවේදී මන්ත්‍රීවරු පෙන්වා දුන්හ.

ඒ අනුව සිකුරාදා විපක්ෂනායකවරයා සහ එක්සත් ජාතික පෙරමුණේ නායකයන් මුණ ගැසී "කඩිනම් විසඳුමකට එළඹීම" සඳහා අවශ්‍ය ක්‍රියාමාර්ග ගනු ලබන බවට ජනාධිපතිවරයා විසින් කතානායකවරයා වෙත දැනුම් දෙනු ලැබූ බව, සාකච්ඡාවෙන් අනතුරුව කතානායක කාර්යාලය නිකුත්කළ නිවේදනයක දැක්වේ.

අගමැතිවරයාගේ මූල්‍ය සම්පාදන කපා දැමීමේ යෝජනාව ඊයේ (29) පාර්ලිමේන්තුවේදී වැඩි ඡන්දයෙන් සම්මත කෙරිණ. ඊට පක්ෂව ඡන්ද 123 ක් ලැබුණු අතර විරුද්ධව කිසිවෙක් ඡන්ද ප්‍රකාශ කළේ නැත.

ජනාධිපතිවරයා විසින් පත් කළ මහින්ද රාජපක්ෂ අගමැතිවරයාගේ පාර්ශවයට සහාය පළ කළ අතුරලියේ රතන හිමි සහ විජේදාස රාජපක්ෂ මහතා ඡන්දය ප්‍රකාශ කිරීමෙන් වැලකී සිටියහ. එම පාර්ශ්වයේ අනෙක් මන්ත්‍රීවරුන් සභා ගැබට පැමිණියේ නැත.

මේ අතර පසුගිය ඉරිදා (නොවැම්බර් 25) විදේශීය මාධ්‍ය ආයතනවලට සේවය කරන මාධ්‍යවේදීන් හමුවූ අවස්ථාවේ ජනාධිපතිවරයා කියා සිටියේ, අගමැතිවරයාගේ මූල්‍ය සම්පාදන කපා දැමීමේ යෝජනාව සම්බන්ධයෙන් නොවැම්බර් 29 වෙනි දින පාර්ලිමේන්තුව "නිසි ක්‍රමවේදයට" යෝජනාවක් සම්මත කළහොත් එවිට තමන්ට ඒ ගැන තීන්දුවක් ගැනීමට සිදුවනු ඇති බවය.

කෙසේ වුවත් රනිල් වික්‍රමසිංහ මහතා යළිත් වරක් අගමැති පදවියට පත් නොකරන බව එදිනත් ජනාධිපතිවරයා අවධාරණය කළේය.

 ජනාධිපතිට පාර්ලිමේන්තුවට අත ගහන්න බැහැ - ජවිපෙ

 පසුගිය සිකුරාදා (නොවැම්බර් 23) පාර්ලිමේන්තුවේදී විශේෂ ප්‍රකාශයක් කළ ජනතා විමුක්ති පෙරමුණේ නායක අනුර කුමාර දිසානායක මන්ත්‍රීවරයා අවධාරණය කළේ, පාර්ලිමේන්තුවේ කටයුතු සම්බන්ධයෙන් රටේ විධායක ජනාධිපතිවරයාට කිසිදු බලපෑමක් කළ නොහැකි බවය.

පාර්ලිමේන්තුව සහ විධායක ජනපතිවරයා යනු එකිනෙකට ස්වාධීන ජනවරමකින් තේරී පත්වන ස්වාධීන ආයතන දෙකක් බව ඔහු පෙන්වා දුන්නේය.

මේ අතර පාර්ලිමේන්තු සැසිවාරයෙන් අනතුරුව ජනාධිපති මෛත්‍රීපාල සිරිසේන මහතා වෙත ලිපියක් යොමු කරන දෙමළ ජාතික සන්ධානය, ඔක්තෝබර් 26 වෙනි දිනට පෙර පැවති එක්සත් ජාතික පෙරමුණේ නායකත්වයෙන් යුතු ආණ්ඩුව යළි පිහිටුවීම සඳහා සහය පළකරන බව දැනුම් දී තිබුණි.

(බීබීසී සිංහල සේවය)