ජනපති,අගමැති සහ විපක්‍ෂ නායකගේ අලුත් අවුරුදු සුබ පැතුම් පණිවුඩ

ශික්‍ෂණය, සංහිඳියාව සමෘද්ධිය සාක්‌ෂාත් වන සුබ නව වසරක්‌ වේවා - ජනපති

උදාවන නව අවුරුද්දේ ආදරණීය ශ්‍රී ලාංකේය ජනතාවගේ සෑම ප්‍රාර්ථනාවක්‌ම ඉටුවන සියල්ලන්ගේ චිර ජීවනය හා සෞභාග්‍යය උදාවන සුබ වසරක්‌ වේවා යෑයි හෘදයාංගමව ප්‍රාර්ථනා කරන බව ජනාධිපති මෛත්‍රීපාල සිරිසේන මහතා සුබ පැතුම් පණිවුඩයක්‌ නිකුත් කරමින් කියා සිටී.
එම පණිවුඩය මෙසේය.

නව වසරක උදාව සිදු වීමට ආසන්නතම මොහොත වනාහි, ගත වූ වසරේ අප ගෙවාලූ ජීවිතය එහි ජය පරාජයන්, සරු නිසරුකම් පිළිබඳව යළි මෙනෙහි කිරීමට සුදුසුම කාලයයි.

අනාගතයට පදනම් වන අතීතය යළි විමසීම මගින් පුද්ගලයා සිය ගමන්මග උවදුරින් තොර, සරු ප්‍රතිඵල සහිත වූවක්‌ බවට පත්කරගනී. නව අපේක්‍ෂාවන් යථාර්ථවත් කර ගැනීමට නව වසරේ අපට හැකි වනුයේ, ගෙවී ගිය වසරේ අප උගත් පාඩම් යළි විමසා බැලීමෙනි.

 ඉපැරණි මහා වාරි නිර්මිතයන් සහිත, මෙරට ඓතිහාසික උරුමය ගැන උද්දාමයට පත් වෙමින් නොසිට, එකී ස්‌වාධීන වාරි ශිෂ්ටාචාරයට උපරි අර්ථයක්‌ ලබාදීමට මාහට හැකි වූයේ අතීතය විමසීමේ ඵල වශයෙනි.

මේ උදාවන්නේ වැරදී ගිය අවස්‌ථා මගින් නිවැරදි මාර්ග වෙත අප යොමු කරවන ඉතිහාසයේ තීරණාත්මක කාලපරිච්ඡේදයකි. ඒ හා බැඳුණු සියලු අභියෝග පුද්ගලයන් වශයෙන් ද, දේශයක්‌ වශයෙන් ද ජය ගත යුතු අවස්‌ථාවකි. එළැඹෙන 2019 අභිනව වර්ෂය ශික්‍ෂණය, සංහිඳියාව හා සමෘද්ධිය සාක්‌ෂාත් කරගත හැකි පුළුල් මාවත් පෙරට වැඩි අවධානයකින් හා නුවණැසකින් හඳුනාගැනීම සඳහා අප හමුවේ උදා වන අධිෂ්ඨානයේ වසරකි.

ඒ නව වර්ෂාරම්භයෙන් උදා වන කාලය ආදරණීය ශ්‍රී ලාංකේය ජනතාව ගේ එහැම ප්‍රාර්ථනා ඉටු වන, සියල්ලන්ගේ චිරජීවනය හා සෞභාග්‍යය සැලසෙන සමයක්‌ම වේවා යෑයි හෘදයංගමව ප්‍රාර්ථනා කරමි.

අනාගත පරපුර වෙනුවෙන් වඩා යහපත් සමාජයක්‌ ගොඩනැඟීමට එක්‌වෙමු - අගමැති 

අනාගත පරපුර වෙනුවෙන් වඩා යහපත් සමාජයක්‌ ගොඩනැංවීමට හදවතින්, පිළිවෙතින්, දිරිමත්ව පෙළගැසෙන මෙන් නව වසරේ සැමට ආරාධනා කරන බව අගමැති රනිල් වික්‍රමසිංහ මහතා සුබපැතුම් පණිවුඩයක්‌ නිකුත් කරමින් සඳහන් කරයි.

එම පණිවුඩය මෙසේය.

2019 නව වසර එළඹෙන්නේ දේශයටත්, ජනතාවටත් නව අරමුණු, අධිෂ්ඨානයන් පෙළගැසෙන නව යුගයක උදාව සමගිනි. නව වසර මහත් හරසරින් පිළිගන්නට සැරසෙන සමස්‌ත ලාංකික ජනතාවට පළමුව මාගේ හෘදයාංගම සුභාශිංසන පිරිනමමි.

ගෙවුණු වසරේ මුහුණ දෙන්නට සිදුවූ බරපතළ අභියෝගය ජයගනිමින් ජනතා පරමාධිපත්‍ය තහවුරු කරමින් නව වසර පිළිගන්නට ලැබීම අප සැම ලද ජයග්‍රහණයකි. ජාති, ආගම්, පක්‍ෂ ආදී කිසිදු භේදයකින් තොරව ප්‍රජාතන්ත්‍රවාදය දිනවීම උදෙසා පෙළගැසුණු ඔබ වෙත මාගේ ගෞරවනීය කෘතවේදීත්වය පිරිනැමීමට මෙය අවස්‌ථාවක්‌ කරගනිමි.

එළඹෙන නව වසර සමස්‌ත ලක්‌වැසි ජනතාවට අභියෝගාත්මක වසරකි. අප දිනාගත් ප්‍රජාතන්ත්‍රීය අයිතීන් තහවුරු කරමින්, අනාගත පරපුර වෙනුවෙන් වඩා යහපත් සමාජයක්‌ ගොඩනැංවීමේ වගකීම අප ඉදිරියේ ඇත. ඒ සඳහා හදවතින්, පිළිවෙතින්, දිරිමත්ව පෙළගැසෙන මෙන් මේ නව වසරේ ඔබ සැමට ආරාධනා කරමි.

සතුරු බලවේගවලින් මවුබිම බේරා ගැනීමට ශක්‌තිය ධෛර්ය ලැබේවා - විපක්‍ෂ නායක මහින්ද රාජපක්‍ෂ


ජාති, ආගම් බේද පසෙකලා මව්බිම සතුරු බලවේගවලින් බේරා ගැනීමට සියලුම ශ්‍රී ලංකාවාසීන්ට නව වසරේදී ශක්‌තිය ධෛර්ය ලැබේවායි හිටපු ජනාධිපති විපක්‍ෂ නායක මහින්ද රාජපක්‍ෂ මහතා නව වසරට සුබපැතුම් පණිවුඩයක්‌ එක්‌කරමින් කියා සිටී.

ලබන්නා වූ 2019 නව වසර සියලුම ශ්‍රී ලංකාවාසී ජනතාවට සුබ නව වසරක්‌ වේවායි ප්‍රාර්ථනය කරන බවද එම සුබපැතුම් පණිවුඩයේ වැඩිදුරටත් සඳහන් වේ.