උදයංගගේ පවුලේ අයගේ බැංකු ගිණුම්වලට විදේශ රටවල් වලින් ඩොලර් ගණන් ලැබිලා !

සැකසහිත මිග් යානා ගනුදෙනුවට සම්බන්ධ රුසියාවේ හිටපු ශ‍්‍රී ලංකා තානාපති උදයංග වීරතුංග මහතාගේ පමණක් නොව ඔහුගේ බිරිඳ, ඇගේ සොහොයුරු හා ඇගේ මවගේ නමින් ශ‍්‍රී ලංකාවේ පිහිටි බැංකු කිහිපයක පවත්වාගෙන යන ගිණුම් කිහිපයකට විදේශ රටවල සිට ඩොලර් විශාල ප‍්‍රමාණයක් ලැබී ඇති බවට මේ වන විට තොරතුරු අනාවරණය වී ඇතැයි නීතිපති දෙපාර්තමේන්තුව ඊයේ (16 දා) කොටුව වැඩබලන මහෙස්ත‍්‍රාත් පි‍්‍රයන්ත ලියනගේ මහතාට දැනුම් දුන්නේය.
එකී මුදල්වලින් රුපියල් මිලියන 72 කට අධික මුදලක් සැකකාර උදයංග වීරතුංග මහතා මේ වන විට පදිංචිව සිටින ඩුබායි රාජ්‍යයට පේ‍්‍රෂණය කර ඇති බවට තොරතුරු අනාවරණය වී ඇතැයිද එහිදී පෙන්වා දුන් නීතිපති දෙපාර්තමේන්තුව වෙනුවෙන් පෙනී සිටි රජයේ අධිනීතිඥ උදාර කරුණාතිලක මහතා ඒ සම්බන්ධයෙන් ද විධිමත් ආකාරයෙන් විමර්ශන සිදුකරන බව අධිකරණයට පැවසීය.

ශී‍්‍ර ලංකා ගුවන් හමුදාවට යුක්රේනයෙන් මිග් යානා මිලදී ගැනීමේ ගනුදෙනුවට අයුතු ලෙස මැදිහත්වී මිලියන ගණනාවක් අයුතු ලෙස උපයා ගැනීමේ සිද්ධියට එරෙහිව පවරා ඇති නඩුවේ පළමුවන සැකකරු වන උදයංග වීරතුංග මහතාගේ නමින් ගම්පහ එක්තරා පෞද්ගලික බැංකු ආයතනයක ආරම්භ කොට ඇති ගිණුමකට විශාල මුදල් ප‍්‍රමාණයක් බැරවී ඇතත් එම බැංකු ශාඛාවේ කළමනාකරු ඒ සම්බන්ධයෙන් කිසිදු පියවරක් ගෙන නොමැති බවද රජයේ අධිනීතිඥ උදාර කරුණාතිලක මහතා එහිදී අධිකරණයට දැනුම් දුන්නේය.

ගම්පහ බැංකු කළමනාකරු පුත්තලම ප‍්‍රදේශයේ පිහිටි බැංකු ශාඛාවට ස්ථාන මාරු ලබාගිය පසු උදයංග වීරතුංග මහතාගේ බැංකු ගිණුම ද එම ශාඛාවට මාරුකර ඇතැයි රජයේ අධිනීතිඥවරයා එහිදී වැඩිදුරටත් පෙන්වා දුන්නේය.

උදයංග වීරතුංග මහතාගේ බිරිඳගේ මව වන ලතා ඉන්ද්‍රානි මාන්නප්පෙරුම මෙන්ම බිරිඳගේ සොහොයුරු ලලිත් නෙළුම් මාන්නප්පෙරුම නමැත්තාද මේ වන විට ඩුබායි හා නෝර්වේ වෙත ගොස් ඇති බැවින් ඒ සම්බන්ධයෙන් සිදුකරන විමර්ශනවලට ඔවුන්ගේ ප‍්‍රකාශ ලබාගැනීමට බාධාවක් වී ඇතැයි ද උදාර කරුණාතිලක මහතා අධිකරණයට පෙන්වා දුන්නේය.

කොටුව අධිකරණය විසින් නිකුත් කළ විවෘත වරෙන්තු නියෝග අනුව ජාත්‍යන්තර පොලිිසිය විසින් නිකුත් කළ ජාත්‍යන්තර රතු නිවේදනය අභියෝගයට ලක් කරමින් සැකකාර උදයංග වීරතුංග මහතා ජාත්‍යන්තර මධ්‍යම කාර්යාංශය වෙත පැමිණිල්ලක් කර ඇති බවද රජයේ අධිනීතිඥවරයා එහිදී අධිකරණයට දැනුම් දුන්නේය.

ශ‍්‍රී ලංකා රජය විසින් උදර්පන පනත යටතේ ශ‍්‍රී ලංකාවට ගෙන්වා ගැනීමට දරන උත්සාහය සම්බන්ධයෙන් අබුඩාබි හි පෙඩරල් අභියාචනා අධිකරණය හමුවේ පවරා ඇති නඩුවේ තීන්දුව පසුගිය දෙසැම්බර් 10 වැනිදා නිකුත් කිරීමට නියමිතව තිබූ නමුත් සැකකාර උදයංග වීරතුංග මහතා විවිධ ලේඛන ඉදිරිපත් කිරීමට අවශ්‍ය බව පෙන්වා නඩු තීන්දුව දිනෙන් දින කල් යවමින් සිටින බවට තොරතුරු ලැබී ඇතැයි ද නීතිපති දෙපාර්තමේන්තුව එහිදී අධිකරණයට පෙන්වා දුන්නේය.

සැකකාර උදයංග වීරතුංග මහතා නමින් ගම්පහ ප‍්‍රදේශයේ බැංකු ආයතනයක පවත්වාගෙන ගිය ගිණුමක තැන්පත් කොට තිබූ මුදලින් යම් ප‍්‍රමාණයක් උදයංග වීරතුංග මහතාගේ ඇටෝර්නි බලකරු වන රුවන් චන්දන නමැත්තා විසින් බැංකු අණකර මගින් යළි ඩුබායි රාජ්‍යයට යවා ඇති බවටද රජයේ අධිනීතිඥවරයා එහිදී අධිකරණයට දැනුම් දුන්නේය.

එම නඩුව ලබන මාර්තු 27 වැනිදා දක්වා කල්තැබීමට නියම කළ මහෙස්ත‍්‍රාත්වරයා එදිනට විමර්ශන සම්බන්ධයෙන් ප‍්‍රගතිය වාර්තා කරන ලෙසට නියෝග කළේය.

මූල්‍ය අපරාධ කොට්ඨාසය වෙනුවෙන් ප‍්‍රධාන පොලිස් පරීක්‍ෂක නිහාල් ප‍්‍රැන්සිස් මහතා පෙනී සිටියේය.

ඒ. ජේ. ඒ. අබේනායක