මව මියගිය නයිවල ‘ඔක්ටොපස්‘ අනතුරින් දියණියත් මියයයි - හිමිකරු පළාගිහින්

වේයන්ගොඩ නයිවල‘නිව් සැනිරෝ ඩ්‍රීම් පැරඩයිස්‘ විනෝද උද්‍යානයේ අනතුර හේතුවෙන් ඊයේ මවක හා දියණියක බරපතල තුවාල ලැබීමෙන් මව මියගිය අතර අද උදෑසන වාර්තාවූයේ කොළඹ ජාතික රෝහලට ඇතුළත් කර සිටි 13 හැවිරිදි දියණියද මියගිය බවයි.
කතුරු ඔන්චිල්ලාවක කොටසක් කඩා වැටීමේ සිද්ධියක් ලෙස මේ ගැන මුල් වාර්තාවල සඳහන් වූ නමුත් එය සත්‍ය ලෙසම කතුරු ඔන්චිල්ලා ලෙස හඳුන්වන ක්‍රීඩා උපකරණයක් නොවූ අතර ‘ඔක්ටොපස්‘ හෙවත් බූවල්ලා යනුවෙන් හඳුන්වන උපකරණයකි.

බූවල්ලකුගේ හැඩයට වෙන් වෙන්ව ගාත්‍රා සවිකර තිබෙන එහි පෙට්ටි 15 ක් පමණ වටේට සවි කර තිබෙන අතර මෙරිගෝ රවුන්ඩ් එකක් පරිද්දෙන් යන්ත්‍රය පණගැන්වූ පසු වටේට කරකැවෙන්නක් බව කියැවේ. එහි කැරකුම් වේගය වට කිහිපයක් යද්දී වැඩි වන අතර පහත තලයකින් කැරකීම ඇරඹී පෙට්ටි කොටස් ඉහළට එසවී පසුව වේගයෙන් කැරකෙන බවද කියැවේ.

මව හා දියණිය අනතුරට පත්වන අවස්ථාවේ ඔවුන් සමග පෙට්ටි 15 න් 10 ක පමණ පිරිස් එහි ගමන් කිරීම සඳහා සහභාගී වී තිබී ඇති අතර මව හා දියණිය සමග දැරියගේ පියාද එම ස්ථානය අසළට පැමිණි මුත් පියා එයට එක් නොවී නරඹමින් සිට ඇත. (එහි ගමන් කිරීමට හැක්කේ දෙදෙනෙකුට බවද කියැවේ)

යන්ත්‍රය පුද්ගලයෙකු විසින් පණගන්වන අතර ඔහු එය පණගන්වා වට දෙකක් යද්දී වේගය වැඩිකර තරමක් ඉහළට පෙට්ටි එසැවී ගමන් කරන තුන්වන වටය ඇරඹී ඇති අතර ඒ සැණින්ම මව හා දියණිය සිටි පෙට්ටිය ගැලවී එතැනින් විසිවී ඇත. මෙම යන්ත්‍රය පිහිටුවා තිබෙන අට්ටාලයේ කණුුවක ඉතා වේගයෙන් පෙට්ටිය වැදී ඇති අතර අනතුරට පත් දෙදෙනා එයින් එළියට වැටී ඇත.

කෙසේ වෙතත් නරඹන්නන් ඇතුළු වටපිට සිටි සියල්ලන් අනතුර දුටු සැණින් කෑගසා ඇති මුත් යන්ත්‍ර ක්‍රියාකාරු එක්වරම එය නතර කර නැත. කරකැවෙමින් තිබුණ ඔක්ටොපස් යන්ත්‍ර යේ අනෙක් පෙට්ටි අනතුර සිදුවූ දෙදෙනාගේ ඇඟේද වදිමින් ඉතිරි වට කැරකී ඇත්තේ එළියට වැටුන දෙදෙනට තවත් තුවාල සිදු කරමිනි.

මහජන විරෝධය මැද ක්‍රියාකරු අවසානයේ යන්ත්‍රය නතර කර ඇත. කෙසේ වෙතත් අනතුරට පත් අය සම්බන්ධයෙන්කිසිදු වගකීමක් ආයතනය දැරුවේ නැති බව මරණයට පත් අය සමග පැමිණි පියා මාධ්‍ය වෙත අදහස් පළ කළේය.

පැය භාගයක් පමණ ගතවීමෙන් පසු දෙදෙනාව රෝහල් ගත කරන ලද්දේද පැමිණි අයගේ වෙහෙස මහන්සියෙන් බව ඔහු දන්වා සිටියේය.

ඊයේ (4) පෙරවරු 11 ට පමණ සිදුවූ අනතුරින්  දිස්නා ජානකී ගනේගොඩ නැමැති 47 වියැති මව ඊයේම මියගිය අතර ඇයගේ 13 හැවිරිදි දියණිය බරපතල තුවාල ලබා ගම්පහ රෝහලට ඇතුළත් කර පසුව වැඩිදුර ප‍්‍රතිකාර සඳහා කොළඹ ජාතික රෝහලට ඇතුළත් කර තිබියදී අද මිය ගියාය.
සිද්ධිය පිළිබඳ පූර්ණ පොලිස් පරීක්ෂණයක් මේවනවිට ආරම්භ කර තිබේ.
 විනෝද උද්‍යානයේ මහජන ආරක්ෂාව සම්බන්ධයෙන් සැලකිල්ල අඩු බවට විවිධචෝදනා තිබේ.
ඔක්ටොපස් යන්ත්‍රය කලකින් නඩත්තුවක්ද සිදුවී නැත.

අනතුර සිදුවන අවස්ථාවේ එහි ක්‍රියාකරු ලෙස කටයුතු කළ පුද්ගලයා මාධ්‍ය වෙත යා සිටියේ තමන් අනතුර සිදුවූ වහාම එය නතර කළ බවකි. නමුත් පියා සිදු කළ ප්‍රකාශය ඊට පරස්පරය.

එම පුද්ගලයාත් ආයතනයේ කළමනාකරු  ඇතුලු 6 දෙනෙකු මේ වනවිට පොලිස් අත්අඩංගුවට පත්ව තිබේ.

හිමිකරු පළාගිහින්

මේ අතර වේයන්ගොඩ නයිවල ‘නිව් සැනිරෝ ඩ්‍රීම් පැරඩයිස්‘ ළමා උද්‍යානය  තාවකාලිකව  තහනම්
කිරීමට අත්තනගල්ල මහෙස්ත්‍රාත්  අශෝකා පතිරණ මහත්මිය අද නියෝග කළාය.

සිද්ධිය වු ස්ථානයට ගිය මහෙස්ත්‍රාත්වරිය එහි මුලික පරීක්ෂණ සිදු කිරීමෙන්   අනතුරුව මෙම  නියෝගය  නිකුත්  කළාය.

සිද්ධියට අදාල පුද්ගලයින්  අත්අඩංගුවට ගෙන අධිකරණයට ඉදිරිපත් කරන ලෙසද මහෙස්ත්‍රාත්වරිය වේයන්ගොඩ පොලීසියට  නියෝග කළාය.

මෙම සිදු වීමෙන් පසු මේ වනවිට යන්ත්‍ර ක්‍රියාකරු කළමනාකරු ඇතුළු 6 දෙනෙකු පොලිස් අත්අඩංගුවට පත්ව ඇති නමුත් එම උද්‍යානයේ හිමිකරු පළා ගොස් ඇති බව වාර්තා විය.  ඔහු අත්අඩංගුවට ගැනීම සඳහා පරීක්ෂණ  අරඹා ඇත.

ඊයේ  (04)  සවස මෙම අනතුර සිදු වී මව  රෝහලට ඇතුළත් කිරිමේදී මිය ගිය අතර දියණිය  අද (05) රෝහලේදී  මිය ගියාය.