ක්‍ෂුද්‍ර මූල්‍ය ණය : 'ගම ආක්‍රමණය කරන පාතාල උවදුරක්' - මහින්ද අනාවරණය කරයි

නීති විරෝධී සහ ක්ෂුද්‍ර මූල්‍ය ආයතනවලින් ලබාගත් ණය මෙන්ම ගෙවීමට නොහැකිව ඇති ණය කපා දමා නව ක්ෂුද්‍ර මූල්‍ය සේවාවක් බිම් මට්ටමින් ස්ථාපිත කරන්නැයි විපක්‍ෂ නායක මහින්ද රාජපක්‍ෂ මහතා පාර්ලිමේන්තුවේදී ඊයේ (04) විශේෂ ප්‍රකාශයක් කරමින් සඳහන් කළේය.

පාතාලය හා සම්බන්ධ වී ගෙන යන මෙම ණය ජාවාරම ග්‍රාමීය ආර්ථිකය විකෘති කිරීමටත්, සාමාන්‍ය ජන ජීවිතය අවුල් කිරීමටත්, අහිංසක පවුල් ජීවිත විනාශ කිරීමටත් ප්‍රබල හේතුවක් බවට පත්වී තියන බව විපක්ෂ නායකවරයා එහිදී අවධාරණය කර සිටියේය.

එහිදී විපක්‍ෂ නායකවරයා වැඩිදුරටත් මෙසේද කියා සිටියේය.

''එදා අපේ ගම්වල අහිංසක ජනතාව කුඩා කණ්ඩායම් ලෙස එක්ව හදිසි අවශ්‍යතාවකදී ප්‍රයෝජනයට ගැනීමට මුදලක් ඉතිරි කිරීමටත්, තම දෛනික අවශ්‍යතා සපුරා ගැනීමටත් අවිධිමත් ණය ක්‍රමයක් තම කණ්ඩායම තුළ ක්‍රීයාත්මක කිරීමටත් පුරුදුව සිටියා.

නිවසේ අවශ්‍යතා මෙන්ම කුඩා ව්‍යාපාර සඳහා අවශ්‍ය ප්‍රාග්ධනය සපුරා ගැනීමට ගම තුළ සීට්ටු ක්‍රමයක් ද එදා ක්‍රියාත්මක වුනා.

පසුගිය දශක පහකට ආසන්න කාලයක් තුළ බොහෝ සංවිධාන විසින් මෙම කණ්ඩායම් ක්‍රමය කෘතිමව යොදා ගනිමින් ගමේ තිබූ සාමුහිකත්වය ලාභ ඉපයීමේ ක්‍රමවේදයකට පෙරලා ගත්තා. මේ තුළින් ක්ෂුද්‍ර මූල්‍ය සංකල්පයේ පදනම වූ දුප්පතා මත විශ්වාසය තැබීමේ මූලික හරය ගමෙන් ඉවත් කළා.

ණයක් ලබා ගැනීමට විශ්වාසය පමණක් ප්‍රමාණවත් නැහැ. අහිංසක ගැමියාට ඒ සඳහා කුමක් හෝ දේපළක් උකසට තැබීමට සිදුවුනා.

ධීවරයාට ධීවර ආම්පන්නත්, ගෘහණිය සතුව තිබූ මහන මැෂිමත්, පාපැදිය, යතුරුපැදිය මෙන්ම ගොවියාගේ වතුර මෝටරය ඇතුළු කෘෂි උපකරණත් ඇපකර වශයෙන් තැබීමට සිදුවී තියනවා.

තම ගොවි නිෂ්පාදන සඳහා සාධාරණ මිලක් නොලැබීම, නියගය නිසා අපේක්‍ෂිත අස්වැන්න නොලැබීම වැනි හේතු ලබාගත් ණය ආපසු ගෙවිය නොහැකි තත්ත්වයකට ගැමියා ඇද දමා තියනවා.

ආණ්ඩුව අයවැය යෝජනා මගින් ජනතාව ලබාගත් ක්ෂුද්‍ර මූල්‍ය ණය කපාහරින බව දිගින් දිගටම පැවසුවද, ණය ලබාදුන් ආයතන මොනවාදැයි හඳුනා ගැනීමට නොහැකි බව පවසා මෙතෙක් ණය කපාහැරීමක් සිදුකර නැහැ.

වඩාත් දරුණු තත්වයක් : ''පොලිය වසරකට 30% සිට 100% දක්වා ඉහලට''

වර්තමානයේ උද්ගතව ඇති තත්ත්වය ඊට වඩා දරුණුයි. ලියාපදිංචි ක්ෂුද්‍ර මූල්‍ය සමාගම්වලට වඩා පුද්ගලික ණය මුදල් සපයන්නන් රට පුරා ව්‍යාප්තව වෙලා. ණය සඳහා ඔවුන් අය කරන පොලිය වසරකට 30% සිට 100% දක්වා වූ පරාසයක්.

ණය ලබාගත් දින සිටම ණය ආපසු ගෙවීම ආරම්භ වෙනවා. ණය වාරික අයකර ගැනීමට ණය ලබා දෙන අයගේ නියෝජිතයා ණයකරුගේ නිවසටම එනවා.

ණය ගෙවීම ප්‍රමාද වීම්, බැණවැදීම්, තර්ජනය කිරීම් පමණක් නොව විවිධ ආකාරයේ අල්ලස් ලබා ගැනීම දක්වා ව්‍යාප්තව ඇති බව වාර්තා වෙනවා.

ඇතැම් විට පාතාලය හා සම්බන්ධ වී ගෙන යන මෙම ණය ජාවාරම ග්‍රාමීය ආර්ථිකය විකෘති කිරීමටත්, සාමාන්‍ය ජන ජීවිතය අවුල් කිරීමටත්, අහිංසක පවුල් ජීවිත විනාශ කිරීමටත් ප්‍රබල හේතුවක් බවට පත්වී තියනවා.

ණය මුදල ලබා ගැනීමට බැංකු ඉල්ලන සුදුසුකම් කිසිවක් අහිංසක ජනතාව සතුව නැහැ. උකසට තැබූ ණයකර ආභරණ බැංකුවට සින්න වෙලා.

ගොවිතැන් කිරීම සඳහා අවශ්‍ය මූලික ප්‍රාග්ධනය හෝ ඔවුන් සතුව නැහැ. මේ වනවිට ග්‍රාමීය ආර්ථිකය දරුණු ප්‍රපාතයකට ඇදවැටී හමාරයි.

මෙවන් තත්ත්වයක් හමුවේ පාතාලය හා බැඳුණු නීති විරෝධී ණය ක්‍රම සමාජයෙන් ඉවත් කිරීමටත්, අවිධිමත් ක්ෂුද්‍ර මූල්‍ය ආයතන හරහා ලබාගත්, ගෙවීමට නොහැකි ණය වහා කපා හැරීමටත්, ආණ්ඩුව කටයුතු කළ යුතු බව මෙම ගරු සභාවට යෝජනා කර සිටින අතර ග්‍රාමීය ආර්ථිකය ශක්තිමත් කරන ක්ෂුද්‍ර මූල්‍ය සේවාවක් බිම් මට්ටමේ ස්ථාපිත කළ යුතු බවත් යෝජනා කර සිටිනවා.

මේ සම්බන්ධව ආණ්ඩුව ගන්නා ක්‍රියාමාර්ග මෙම ගරු සභාවට පැහැදිලි කරන ලෙස ද ඉල්ලා සිටිමු.
gossip lanka